SEMANA DA CIENCIA E DA CULTURA

Durante os días 21, 22 e 23 de marzo realizamos unha serie de actividades dentro da Semana da Ciencia e da Cultura. Esta é unha revista que presenta un breve resumo de todas aquelas actividades.

A revista tamén a tedes en papel nas aulas e na biblioteca do cole:

"A Vaquiña polo que vale": GEN10S PARTY

Tres alumnos de primaria do noso cole xunto a súa profe Camino participan na GEN10S Party  que se está a celebrar hoxe 12 de xuño en Madrid.

A GEN10S Party  é un evento no que os equipos participantes mostran e comparten as súas propostas para resolver o reto de Xene1Os. En cada edición, proponse unha temática que convide os equipos participantes a reflexionar sobre a mellora dalgún aspecto da súa contorna social. A organización describirá a temática e engadirá un conxunto de restricións para dar complexidade ao reto.

A temática deste ano 2017  é: A loita contra o traballo infantil e o reto programar unha historia, unha historia interactiva, un videoxogo ou unha aplicación na que se aborde a problemática dos nenos e nenas que son obrigados a traballar (no campo, nunha fábrica, etc.)

A xornada concluirá con talleres de innovación tecnolóxica dirixidos aos nenos e nenas participantes.

Moita sorte aos rapaces do noso cole e a súa profe Camino que están nestes momentos gozando da experiencia en Madrid.

"A vaquiña polo que vale": Experiencias. Aulas 2.0: Scratch no CPI Virxe DA Cela Monfero no Espazo Abalar!!!

A experiencia de programar con Scratch no CPI Virxe DA Cela Monfero no Espazo Abalar!!!

                                          Podedes acceder premendo na seguinte imaxe:

https://www.edu.xunta.es/espazoAbalar/espazo/experiencias/experiencia/programar-con-scratch

"A Vaquiña polo que vale": avaliaos o proxecto dos Masai. Queres ver que facemos cos robots?

Hoxe  os nenos e profes de infantil avaliaron o seu proxecto dos Masai coa axuda de Mónica e o seu robot no Virxe DA Cela. Que ben o pasaron e canto saben estos nenos e nenas! Ás profes costoulles algo máis isto de andar con robots...

VIII RASTRO SOLIDARIO E OPERACIÓN QUILO 2016

Os rapaces e rapazas de 2º da ESO visitaron todas as aulas do CPI Virxe da Cela para repartir entre o alumnado unhas circulares informativas sobre a VIII edición do Rastro Solidario e Operación Quilo 2016. Durante os próximos días recolleremos todos aqueles obxectos que podades aportar para vender no Rastro (libros, cds, dvds, bisutería, xoguetes, etc), que se celebrará o vindeiro venres 18 de marzo, último día antes das vacacións de Semana Santa.



VIII RASTRO SOLIDARIO E OPERACIÓN QUILO 2016

Sabemos que é un enorme esforzo realizado durante semanas, pero está claro que vale a pena. Van xa oito as edicións de Rastro Solidario efectuadas no CPI Virxe da Cela durante os últimos anos, e nestas últimas combinándose a Operación Quilo. Con moita ilusión alumnado e profesorado do centro visitaron o Rastro o pasado venres 18 de marzo de 2016, facendo as compras dos obxectos alí expostos por medio de troco con alimentos. 

Unha boa pila de caixas están agora esperando a ser levadas á Cociña Económica de Ferrol, ao igual que unha significativa axuda en metálico de 159 euros recadada á base de donativos. 

 Queremos agradecer públicamente a colaboración da AMPA difundindo esta actividade e destacando a presenza de pais e nais que axudaron durante toda a mañá a organizar os alimentos en caixas e a facilitar as comparas dos mais pequenos (Jaime M. Caamaño, María José Varela, Elena Sanjuán e Sandra). 

 Nesta xornada tan especial completamos o día con dous obradoiros de Comercio Xusto e Consumo Responsable impartidos por Solidariedade Internacional Galicia, así como dun programa radiofónico especial sobre o Rastro Solidario, dirixido por Lucía Abarrategui y Sergio Pascual, a través do Laboratorio Radiofónico, e guiado polo alumnado de 4º e 5º de primaria. 

 Contamos tamén con importantes visitas, como de Beatriz Varela (Fundación Ayuda en Acción), a nosa ben querida exalumna Anaís, que veu acompañada pola súa avoa. E, ao final do día, deixáronse ver un grupiño de exalumnos/as que na actualidade están a cursar os seus estudios nos institutos de Betanzos, que saudaron cariñosamente ao profesorado e participaron incluso nos obradoiros que estaban a realizar o alumnado de 3º e 4º da ESO, mentres os rapaces e rapazas de 1º e 2º da ESO traballaban organizadamente para desmantelar de novo o “chiringuito” e deixar os obxectos sobrantes en caixas esperando á próxima edición do Rastro.

Crónica rastro solidario from satelite1

OBRADOIROS DE COMERCIO XUSTO E CONSUMO RESPONSABLE

O venres 18 marzo de 2016 o alumnado da ESO do CPI Virxe da Cela recibiu un obradoiro de Comercio Xusto e Consumo Responsable impartido por Ana Lampón, técnica da ONG Solidariedade Internacional Galicia, xunto con Elisangela Silfa, voluntaria nesta organización e que na actualidade está en Galicia cunha beca do seu país, República Dominicana, realizando o Mestrado Universitario en Dirección, Xestión e Innovación de Institucións Escolares e Socioeducativas na Universidade da Coruña. 

Transcribimos aquí as palabras de Ana Lampón describindo a actividade: O obradoiro de Consumo Responsable ten a finalidade de que nos demos conta da importancia que ten o consumo nas nosas vidas, dende que nos levantamos ata que nos deitamos estamos consumindo. De aí a importancia de reflexionar sobre os nosos xeitos de consumir. 

O consumo responsable é aquel que se basea na elección de produtos non solo pola súa calidade e o seu prezo, senón tamén polo impacto social e ambiental, pola conduta das persoas e/ou empresas que o elaboran. Tamén implica consumir menos, soamente o necesario para un bo vivir, e estar a atentos á publicidade para saber como nos crea falsas necesidades.

 A actual sociedade de consumo, pretende facernos crer que a nosa felicidade se consegue comprando e consumindo sen sentido, polo que traballar cos mozos e mozas estas temáticas é tan importante, sobre todo proporcionando alternativas como poden ser o Comercio Xusto, o consumo ecolóxico, de proximidade, a economía social ou solidaria, etc. Sobre os contidos, traballamos na identificación e diferenza entre necesidades e desexos, os conceptos do comercio tradicional como as multinacionais ou a deslocalización, os dereitos dos produtores dos países empobrecidos, etc. 

 A resposta das mozas e dos mozos da ESO do CPI Virxe da Cela foi excelente, participaron moi activamente nas dinámicas e actividades propostas, implicáronse na procura de solucións aos problemas plantexados, e levaron moi ben os contidos do taller á práctica da vida cotiá. Cabe destacar que, en xeral, son un alumnado moi concienciado e solidario. Ana Lampón. Solidariedade Internacional Galicia

Crónica obradoiros comercio xusto e consumo responsable from satelite1

ESPECIAL RADIOFÓNICO VIII RASTRO SOLIDARIO E OPERACIÓN QUILO 2016

O alumnado de 4º e 5º de primaria do CPI Virxe da Cela gravaron un especial radiofónico para retransmitir a VIII edición do Rastro Solidario e Operación Quilo 2016. Entrevistaron a alumnado e profesorado que traballou na organización deste evento solidario (como a alumna Diana Caruncho de 4º da ESO ou a profesora Verónica Dopico), así como a outros profesionais que visitaron o noso centro, como a Elisangela Silfa, moza da República Dominicana voluntaria na ONG Solidariedade Internacional Galicia que impartiu un obradoiro de Comercio Xusto e Consumo Responsable. Agradecemos a Sergio Pascual e Lucía Abarrategui a súa implicación nas actividades no noso centro e o magnífico traballo que están a facer a través do Laboratorio Radiofónico "Radio Itinerante Creativa".

PROXECTO MÓVETE

A directora xeral de Xuventude, Participación e Voluntariado, Cecilia Vázquez, inaugurou hoxe este proxecto piloto no CPIP Virxe da Cela de Monfero. A iniciativa tamén se levará a cabo no CEIP das Fontiñas de Santiago e no da Lomba en Vilagarcía de Arousa. O programa “Móvete” pretende ser un instrumento para a formación integral dos estudantes máis novos a través de valores asociados ao voluntariado e á solidariedade dende un contexto lúdico e vincula á música como elemento de motivación. 

A Consellería de Política Social, a través da Dirección Xeral de Xuventude, Participación e Voluntariado, inicia de xeito experimental o programa “Móvete” de dinamización do voluntariado entre o alumnado dos primeiros cursos de educación Primaria. Este proxecto piloto levarase a cabo en tres centros de ensinanza Infantil e Primaria: o Virxe da Cela de Monfero, o das Fontiñas de Santiago e o da Lomba en Vilagarcía de Arousa. En total, participarán en Móvete ata final de curso máis dun cento de nenos e nenas entre os 6 e os 10 anos de idade. 

A directora xeral de Xuventude, Participación e Voluntariado, Cecilia Vázquez, inaugurou esta mañá este programa no CPIP Monfero, que “pretende ser un instrumento para a formación integral dos estudantes máis novos a través dos valores asociados ao voluntariado e á solidariedade dende un contexto lúdico e vinculado á música como elemento de motivación”, dixo. Así, este programa conta como base coa canción e o vídeo “Móvete” de Paco Nogueiras, a través da que se elaborará unha unidade didáctica de aplicación a través duns obradoiros en cada centro.

 Os obxectivos da unidade didáctica céntranse na posta en valor da solidariedade e na acción voluntaria como medio para mellorar as realidades dos máis desfavorecidos. Accións solidarias en cada centro. Nas unidades didácticas cada centro escollerá unha acción solidaria para desenvolver co alumnado, que estará adecuada ás idades do grupo seleccionado e que poderá ser de sensibilización ou dun carácter máis activo, segundo o diagnosticado nos obradoiros iniciais. 

 Por último, Cecilia Vázquez destacou que “con este proxecto estamos en disposición de ofrecerlles aos mozos e mozas galegos a posibilidades de que desenvolvan un itinerario voluntario completo e continuo”. De tal xeito que este itinerario comeza en Primaria con Móvete, segue con Pasaporte Solidario –dirixido a rapaces de ata 12 anos-, continua coa Rede de Centros Solidarios para estudantes de Secundaria, e complétase co Servizo de Voluntariado Xuvenil, que se prolonga ata os 30 anos.

Texto movete from satelite1

Texto paco nogueiras from satelite1

Prensa:

La Xunta acerca el voluntariado al alumnado del CPI Virxe da Cela: Implicar a las comunidades educativas en la promoción de los ideales de solidaridad, participación, compromiso social y voluntariado, a través de una  .

OBRADOIRO "MÓVETE". RCES

Vantaxes vivir no rural from satelite1

VISITA FUNDACIÓN REPSOL

Talento, compromiso, coñecemento, innovación… elementos fundamentais para a construción dun futuro sostible: para a esta meta se dirixen os esforzos do CPI Virxe da Cela, a Fundación Ayuda en Acción e a Fundación Repsol nunha aposta conxunta. Utilizando como materia prima a enerxía das persoas, estes tres colectivos tiveron a oportunidade de intercambiar puntos de vista e construír os cimentos de futuras actuacións durante unha primeira visita ao noso centro educativo (mércores 18 de novembro de 2015). Foi unha estancia curta pero moi produtiva. 

Tras as presentacións oficiais o equipo directivo e un representante da ANPA acompañaron aos nosos convidados a asistir a unha clase de programación dentro do proxecto Genios, promovido por Fundación Ayuda en Acción en colaboración con Google.org. Ignacio Egea (vicepresidente da Fundación Repsol) e Javier Inclán (director da area social e institucional de Repsol) puideron comprobar de primeira man que o noso centro aposta por romper a brecha dixital e que grazas ao compromiso de Ayuda en Acción os nosos alumnos e alumnas están a adquirir ferramentas e competencias que os capacitarán tanto para o seu futuro profesional como para o desenvolvemento integral como persoas e cidadáns, xa que en todo o proceso educativo prima o traballo en equipo e os valores. 

 Como broche final o alumnado de 3º da ESO guiou un programa radiofónico en directo onde os principais actores deste traballo conxunto tiveron a oportunidade de expresarse. Beatriz Varela, técnico de Ayuda en Acción, explicou detalladamente a liña de actuación do programa de innovación tecnolóxica Smartick que se está a desenvolver co alumnado de primaria, e xa pasando a un plano máis persoal relatou a súa experiencia como voluntaria nos proxectos educativos que Ayuda en Acción está levando a cabo en América Latina. Yon Penas, encargado de impartir docencia no noso centro dentro do programa Genios, manifestou a súa admiración tanto polas ganas e motivación do noso alumnado como pola cantidade e variedade de actividades que se están a desenvolver no noso centro. 

As palabras de despedida de Ignacio Egea e Javier Inclán quedarán flotando nas ondas e no espazo e esperamos que sigan resoando e facendo eco nos oídos dos nosos nenos e nenas, xa que ambos directivos de Repsol salientaron que para soñar e construír o futuro non fai falla gasolina, senón a simple enerxía que produce a mente e o corazón.

Crónica visita fundación repsol from satelite1

Visita fundación repsol monfero from satelite1

Crónica laboratorio radiofónico visita repsol from satelite1

Libro repsol from satelite1

I XORNADAS DE CONVIVENCIA ESCOLA-UNIVERSIDADE

Esta semana finalizaron en Monfero as “I Xornadas de Convivencia Escola-Universidade”, organizadas polo CPI Plurilingüe Virxe da Cela de Monfero e a Facultade de Ciencias da Educación da Universidade da Coruña. Foi un espazo de encontro entre a comunidade educativa do CPI e os estudantes do primeiro curso do Grao en Educación Primaria da UDC, dirixido a promover o coñecemento mutuo e a fomentar o traballo colaborativo entre ambos os colectivos.

As xornadas desenvólvense ao longo de dous días (10 de novembro e 7 de decembro de 2015), nos que os estudantes universitarios desprazáronse ata Monfero para coñecer de primeira man os distintos proxectos educativos que se están levando a cabo desde o CPI Virxe da Cela.

Desta forma, en palabras de Helena Zapico, profesora do Departamento de Pedagoxía e Didáctica da Universidade da Coruña e unha das promotoras da iniciativa, “as futuras mestras e mestres, que veñen de iniciar a súa andaina formativa na UDC, interactuando coas cativas e cativos de Primaria, así como co profesorado do centro, participando directamente en distintos proxectos, tales como os obradoiros de Radio itinerante Creativa ou de Programación e pensamento computacional ".

 Trátase de dúas das propostas pedagóxicas desenvolvidas durante este curso no CPI e que, segundo a directora do centro, Mª del Camiño Pereiro, permiten configurar a escola como unha comunidade de aprendizaxe, máxime cando nos atopamos nun ámbito rural, que necesita do coñecemento e a valoración da formación como vía de desenvolvemento persoal e social.”

Na primeira xornada, ademais de participar nos obradoiros e de crear micro-relatos de sensibilización ambiental para logo compartilos a través da radio, o alumnado universitario involucrouse, entre outras actividades, no desenvolvemento dunha mesa redonda sobre o tema “Educar en comunidade: máis aló do ámbito curricular", onde descubriron da man do profesorado e dos alumnos e alumnas do CPI novas formas de ensinar e aprender.

Os rapaces de 3º e 4º de primaria da Radio do CPI Virxe da Cela, reciben neste primeiro encontro Escola-Universidade a mestres en potencia; todos facendo radio en prol do medio ambiente. No espazo, tivemos a oportunidad de falar ca Directora do Estudos do Territorio, Inés Santé, que nos falou sobre o Premio a Paisaxe e Sustentabilidade que acadou o CPI Virxe da Cela



Ditas actuacións, reforzáronse co desenvolvemento da segunda xornada, onde o eixo central xiro ao redor de "A educación como aposta de futuro"; reflexión compartida onde alumnado, familias (representadas pola ANPA), profesorado e futuros docentes debateron sobre o modelo educativo actual e sobre os retos de futuro que debe afrontar.

 Dentro desta liña, destacaremos as entrevistas realizadas no marco da xornadas ao docente Carlos García Pérez e a Inés Santé Riveira, directora do Instituto de Estudos do Territorio. Como vemos, o desenvolvemento destas xornadas é un paso máis no camiño da colaboración que iniciaron entre ambas institucións, pois como conta Helena Zapico, “a través de Nova Escola Galega e especialmente do seu grupo Cavila, fomos coñecendo algúns dous magníficos proxectos de innovación educativa que se ían desenvolvendo no Virxe da Cela, coma por exemplo ou Monfero solidario, Sustentabilidade e Paisaxe, E-Dixgal…



Foi así como comezamos a analizar estas iniciativas nas nosas aulas e mesmo o ano pasado convidamos ao cole a participar nunhas xornadas de Prácticum celebradas na nosa facultade, nas que o propio alumnado explicaba aos nosos estudantes de último ano de carreira como estaban a traballar no colexio e como crían que debía ser un bo docente. Pouco a pouco, vaise consolidando este contacto co CPI, ata que neste curso decidimos dar un paso máis, e velaquí estamos!”. Unha forma máis de dar a coñecer propostas educativas valiosas e de mellorar ademais a formación dos futuros profesionais da educación.

Crónica i xornadas convivencia escola from satelite1

Prensa: 
LA VOZ DE GALICIA

 Estudiantes de la UDC trabajan con los alumnos del colegio de Monfero